Rev 5 | MED | STEP | Wote, rᵾpᵾndi pol ila morum wamp ei nga ki mbo orunga, buk kat mbuldung oldung orunga mondᵾk mᵾkᵾp rok tetᵾng ila kᵾndᵾr. Buk kᵾⱡ kan 7 kat ndi, oi rok kᵾn, kan rok gi nduk pendᵾtᵾng.

Revelation of John 5

Buk Kat Mᵾkᵾp Rok Pendᵾtᵾng Kᵾⱡ, Jon Kᵾndrᵾm

1 Wote, rᵾpᵾndi pol ila morum wamp ei nga ki mbo orunga, buk kat mbuldung oldung orunga mondᵾk mᵾkᵾp rok tetᵾng ila kᵾndᵾr. Buk kᵾⱡ kan 7 kat ndi, oi rok kᵾn, kan rok gi nduk pendᵾtᵾng. 2 Wote, na kᵾndᵾr mel, anggelo ronduⱡ pi ti ndi, wi ronduⱡ ropa, nimba mel, “Wamp kai nam ti ndi kapⱡa, buk ei nga kan imp moⱡpa petᵾm kᵾⱡ, koⱡmung etpa mundpa pilinga, ndumba nda?” nitim. 3 Wote, muⱡ kona ila wamp ti kep, mᵾi kona ila wamp ti kep, mᵾi mana orunga wamp ti ndi kep, buk ei kapⱡa pilinga ndupa, rukᵾr orunga mon morum kᵾⱡ mel mon itim kanᵾmba mbᵾ ei, kumba tᵾk rukᵾr orunga kᵾni nᵾkᵾning mon. 4 Ei kᵾn, na ka ou ndupa it. Ei nambuⱡ emel, buk nᵾnt kᵾⱡ pilinga, nduk kᵾning ei nga wamp ti, kapⱡa muⱡi nᵾmbrᵾm. 5 Wote, rᵾp wu tenda ti ndi, na kundpa, nimba mel “Nim ka iti nᵾti! Nim kan ei, Jura wamp rᵾⱡaip ila nga kui Laiyon ti, anda kouwᵾ Depit nga mema kᵾngan ila oⱡa urum wamp ei ndi, el ropa int pinditim ei ndi kapⱡa, buk ei nga kan 7 kᵾⱡ koⱡmung etpa pilinga, ndupa mundᵾmba,” nitim

6 Wote, na kᵾndᵾr mel, kng Sipsip Waⱡ ei, wamp rok kondurmin ni mel etpa, rᵾpᵾndi pol ruk ting ila, anggilpa murum. Wote, mel kont mul tᵾmbᵾkak kat ni kᵾⱡ kᵾn, rᵾp wu nimbᵾ kᵾn kunda, tᵾk pok etᵾk morung. Sipsip ei nga kom 7 anggilpa, mong 7 anggilpa itim. Ei, Got nga muⱡnga 7 kᵾⱡ, Got ndi, mᵾi kona mul kᵾmp mbila, elpa elpa tᵾpa mundrum. 7 Ni kᵾn, rᵾpᵾndi pol ila morum wamp ei nga ki mbo orunga, buk tetᵾm ni kᵾⱡ, Sipsip Waⱡ ei ndi mba titim. 8 Wote, buk kᵾⱡ tᵾpa ambuⱡnga kᵾn, mel kont mul tᵾmbᵾkak kᵾⱡ kᵾn, rᵾp wu 24 kᵾⱡ kᵾn kunda, Sipsip Waⱡ ei nga kᵾmp puⱡ ila rumᵾⱡi petᵾng. Wamp nimbᵾ ndi, kinan nᵾk etmin, gita mbo elpa kat ti, ti nᵾk ambulk, gol ming eng rui kat ambrung ni kᵾⱡ, muⱡ kuip kuip ropa, mura ropa pitim. Uⱡ ei ndi, Got nga wamp mbᵾ, atinga rormin ei nga ora ndupa itim. 9 Wu kᵾⱡ ndi, kinan kont kat, Sipsip Waⱡ ei nga mbi paka rondᵾk, nᵾk mel, “Nim ndi kapⱡa, buk kᵾⱡ nga kan 7 imp morum kᵾⱡ, rokᵾn koⱡmung itin. Ei nambuⱡ emel, nim rok kondᵾk etᵾng uⱡ ila, nim nga mema oi ndukᵾn kᵾn, mᵾi kona mbila pora, wamp rᵾⱡaip elpa elpa na, ik na, kᵾng elpa elpa na mbᵾ, rop rokᵾn, rukᵾr tᵾkᵾn Got ngurᵾn. 10 Nim ndi, wamp mbᵾ tᵾkᵾn, mumuk rokᵾn, tᵾn nga Got nga kongun kindmant indeing nᵾkᵾn etkᵾn, pris monduⱡina kᵾn, mᵾi kona wamp mbᵾ rᵾp etmin,” nᵾtᵾng.

Sipsip Waⱡ Ei Nga Mbi Paka Rondrᵾng

11 Wote, aldpa na kandᵾp kᵾn, kum tep pit mel, anggelo andret tausen miliyon minal minal mbᵾ anggilik kᵾn, rᵾpᵾndi pol kᵾⱡ kᵾn, mel kont mul tᵾmbᵾkak kᵾⱡ kᵾn, wote rᵾp wu nimbᵾ kunda, tᵾk pok etᵾk morung. 12 Ni kᵾn, kinan oⱡa nduk, nᵾk mel, “Sipsip waⱡ ei, unt rok kondrung uⱡ ei ndi, kapⱡa mbi ou tᵾpa, mel kai mbᵾ pora tᵾpa, pilpa kungᵾndi kai mbᵾ, tᵾpa ronduⱡ mam mbᵾ tᵾpa tangga kᵾn, wamp mbᵾ ndi, elim nga mbi ei paka rondᵾk ambulk palk, angge nᵾk iting,” nᵾtᵾng. 13 Na kum tep pit mel, Got nga mim itim mel mat, muⱡ ila tetᵾm mel mat, mᵾi ila tetᵾm mel mat, mᵾi mana orunga tepa mel mat, num kuta mbila tepa etᵾm mel mbᵾ ndi pora, kinan nᵾk mel, “Rᵾpᵾndi pol ila morum wamp ei kᵾn, Sipsip Waⱡ ei kᵾn kunda, mbi ou ti uⱡ na, ambuⱡpa pᵾl uⱡ na, angge ni uⱡ ronduⱡ na mbᵾ pora, rᵾk rᵾk pepa mint pangga!” nᵾtᵾng. 14 Ni kᵾn, mel tᵾmbᵾkak kont mul ni kᵾⱡ ndi, punt rok nᵾk mel, “Uⱡ ei kupa!” nᵾtᵾng. Wote, rᵾp wu mbᵾ ndi, rumᵾⱡi pek mbi paka rondrᵾng.